ស្លាប់៩នាក់រងរបួសជាង៥០នាក់ករណីរថយន្តធុនធំបុករះរថយន្តដឹកកម្មករ កម្មការនីរោងចក្រក្នុងស្រុកកំពង់ត្រឡាច ខេត្តកំពង់ឆ្នាំង

ខេត្តកំពង់ឆ្នាំង៖ មានករណីគ្រោះថ្នាក់ចរាចរណ៍ដ៏រន្ធត់មួយ បានកើតឡើងនៅព្រឹកថ្ងៃសៅរ៍ ទី២៣ ខែឧសភា ឆ្នាំ២០២៦ វេលាម៉ោង ៦:២០នាទីព្រឹក ដោយរថយន្តធុនធំមួយគ្រឿង បានបើកបុករះ បណ្ដាលឲ្យមានអ្នកស្លាប់ និងរងរបួសជាច្រើននាក់។

ហេតុការណ៍នេះ បានកើតឡើងនៅតាមបណ្ដោយផ្លូវជាតិលេខ៥ ស្ថិតក្នុងភូមិសាស្ត្រស្រុកកំពង់ត្រឡាច ខេត្តកំពង់ឆ្នាំង បង្កការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងអ្នកធ្វើដំណើរតាមដងផ្លូវ។

ក្រោយកើតហេតុ គេឃើញមានវត្តមានឯកឧត្តមអភិបាលខេត្តកំពង់ឆ្នាំងឯកឧត្តមព្រះរាជអាជ្ញាខេត្តកំពង់ឆ្នាំងលោកឧត្តមសេនីយ៍ទោ តេង ចាន់ណាត ស្នងការខេត្តកំពង់ឆ្នាំង និងនាយកដ្ឋាននគរបាលចរាចរណ៍សណ្តាប់ធ្នាប់ក្រសួងមហាផ្ទៃដឹកនាំដោយលោកឧត្តមសេនីយ៍ទោ ឡោ ម៉េងហួត ប្រធាននាយកដ្ឋានស្តីទីបានអញ្ជើញចុះអន្តរាគមន៍ភ្លាមៗរួមនិង
សមត្ថកិច្ចជំនាញ ក្រុមសង្គ្រោះបន្ទាន់ បានចុះអន្តរាគមន៍ភ្លាមៗ ដើម្បីជួយសង្គ្រោះជនរងគ្រោះដឹកយកទៅព្យាបាលនៅមន្ទ្ទីរពេទ្យ និងសម្រួលចរាចរណ៍នៅទីតាំងកើតហេតុ ខណៈមូលហេតុនៃគ្រោះថ្នាក់ កំពុងស្ថិតក្រោមការស្រាវជ្រាវរបស់សមត្ថកិច្ច។ យោងតាមរបាយការណ៍របស់សមត្ថកិច្ចជំនាញបានឲ្យដឹងថា ករណីគ្រោះថ្នាក់ចរាចរណ៍ករណីកើតឡើងនៅភូមិសាលាលេខ៥ ឃុំអូរឬស្សី ស្រុកកំពង់ត្រឡាច ខេត្តកំពង់ឆ្នាំង រវាងរថយន្ត ដឹកទំនិញធុនធំជាមួយរថយន្តដឹកជញ្ជូនកម្មករនិយោជិត ដែលមានជនរងគ្រោះចំនួន ៥៣នាក់ (ស្រី ៥០នាក់) ក្នុងនោះ ស្លាប់ចំនួន ១០នាក់ (ស្រី ៨នាក់) របួសធ្ងន់ចំនួន ៩នាក់ (ស្រី ៨នាក់) និងរបួសស្រាលចំនួន ៣៥នាក់ (ស្រី ៣៤នាក់)។

សូមអ្នកបើកបរទាំងអស់ បង្កើនការប្រុងប្រយ័ត្ន និងគោរពច្បាប់ចរាចរណ៍ ដើម្បីបញ្ចៀសគ្រោះថ្នាក់ជាយថាហេតុ៕